ⵉⴷⵔⴰ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ ⴳ ⵜⵙⵓⵜⵍⵜ ⵏⵏⵙ ⵜⵉⵙ ⵡⴰⴳⵏⴰⵔ ⴷ ⵜⵥⴰⵜ
ⵉⴷⵔⴰ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⵙⵓⵜⵍⵜ ⵜⵉⵙ ⵡⴰⴳⵏⴰⵔ ⴷ ⵜⵥⴰⵜ ⵏ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ, ⵏⵏⴰ ⵖⴰ ⵉⵜⵜⵓⵙⵏⵎⴰⵍⴰⵏ ⵙ ⵉⵡⵉⵣ ⵢⴰⵜⵜⵓⵢⵏ ⵏ ⴱⴰⴱⴰ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ, ⴳ ⵜⵉⵣⵉ ⵉⵍⵍⴰⵏ ⵏⴳⵔ 09 ⴰⵔ 19 ⵎⴰⵢⵢⵓ 2024 ⴳ ⵕⵕⴱⴰⵟ, ⴷⴷⴰⵡ ⵜⵎⴰⵜⴰⵔⵜ: "ⵖⵔ ⵓⵙⴷⵓⵙ ⵏ ⵜⴷⵍⵙⴰ ⵏ ⵓⴳⴳⵉⵡⵙ".
ⵉⵡⴰⵜⵜⵙ ⵓⵙⵇⵇⵉⵎ ⵙ ⵜⴷⵔⴰⵡⵜ ⴰⴷ ⴰⵙⵕⵚⵚⴰ ⵏ ⵢⴰⵜ ⵜⴷⵍⵙⴰ ⵉⴱⴷⴷⵏ ⵅⴼ ⵓⵏⵏⵓⵕⵥⵎ ⴷ ⵓⵙⴷⵓⵙ ⵏ ⵓⵙⵎⴰⴷ ⴳ ⵜⵉⵍⴰⵍ ⵏ ⵜⵙⵏⴱⴹⴰⵢⵉⵏ ⵜⵉⵥⵕⴼⴰⵏⵉⵏ ⴷ ⵜⴼⵓⵍⵉⵏ ⵜⵉⵎⵏⵜⴰⵢⵉⵏ, ⴳⵉⵙⵏⵜ ⴰⵡⴷ ⵉⵏⵎⵓⵔⴰⵏ ⴷ ⵜⵏⵎⵓⵔⴰ. ⴳ ⵓⵙⴰⵜⵉ ⴰⴷ, ⵉⵙⵔⵙ ⵓⵙⵇⵇⵉⵎ ⵢⴰⵏ ⵓⵖⴰⵡⴰⵙ ⵏ ⵓⵎⵢⴰⵡⴰⴹ ⵜⴰⴼⴰ ⴰⴷ ⵢⴰⵊⵊ ⵉⵏⴱⴳⵉⵡⵏ ⵏ ⵓⴳⵎⵎⴰⴹ ⵏⵏⵙ ⴰⴷ ⵉⵙⵉⵏⵏ ⵜⵉⵙⵎⵉⴳⴰⵍ ⴷ ⵜⵥⵍⴰⵢⵉⵏ ⵙⵔⵙ ⵉⵥⵍⵉⵏ ⵍⵍⵉⴳ ⵉⴳⴰ ⴰⴳⵔⴰⵡ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⵏ ⵓⵥⵕⴼ ⴰⴳⴷⵓⴷⴰⵏ ⵉⵜⵜⵓⵙⵎⴰⴳⵍⵏ ⵙ ⵡⴰⵏⵏⴰⵍ ⴷ ⵓⴼⵔⴰⴳ ⵏ ⵉⵎⵏⵣⴰⵢⵏ ⴷ ⵡⴰⵜⵉⴳⵏ ⵏ ⵜⵏⵏⵓⴱⴹⴰ ⵉⵀⵢⵢⴰⵏ ⴷ ⵜⵙⵓⵙⵖⵜ ⴷ ⵜⵎⵙⵙⵉⴹⵏⵜ.
ⴰⵔ ⵉⵙⵎⵓⵏⴰ ⵓⵖⴰⵡⴰⵙ ⴰⴷ ⴰⵙⵏⵎⴰⵍⴰ ⵏ ⴽⵕⴰⴹⵜ ⵏ ⵜⵉⵏⴰⵡⵉⵏ ⵜⵉⵎⴰⵙⵙⴰⵏⵉⵏ ⵙ ⵡⵓⵜⵓⵢ ⵏ ⵉⵎⵙⵜⴳⴳⴰⵔⵏ ⵉⵏⵣⵔⴰⴼⵏ ⴳ ⵜⵙⵏⴱⴹⴰⵢⵉⵏ ⵜⵉⵥⵕⴼⴰⵏⵉⵏ, ⵉⵣⴷⵉⵏ ⴷ ⵓⴱⵣⴰⵔ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵓⵙⴷⵓⵙ ⵏ ⵜⵕⵡⵉ ⵏ ⵜⵡⵓⵔⵉ ⵜⴰⴳⴷⵓⴷⴰⵏⵜ, ⴷ ⵜⵎⴰⴳⵍⴰⵢⵜ ⵜⴰⵏⵣⵔⴰⴼⵜ ⵏ ⵓⵙⵇⵇⵉⵎ ⴳ ⵢⵉⴳⵔ ⵏ ⵓⴼⵔⴰⴳ ⵏ ⵓⵥⵕⴼ ⴰⴳⴷⵓⴷⴰⵏ, ⴷ ⵡⴰⵏⵏⴰⵍ ⵏ ⵉⵎⵏⵣⴰⵢⵏ ⵏ ⵜⵙⵓⵙⵖⵜ ⴷ ⵓⵙⵖⵓⴷⵓ ⵏ ⵜⵓⴷⵔⵜ ⵜⴰⵎⴰⵜⴰⵢⵜ ⵙ ⵜⵖⴰⵔⴰⵙⵜ ⵏ ⵜⵥⵍⴰⵢⵜ ⵏ ⵡⵓⴹⵓⴼ ⴷ ⵜⴹⴼⵕⵉ ⵏ ⵜⵙⴳⵓⵔⵉ ⵜⵓⵛⵛⵉⵍⵜ ⵏ ⵡⴰⴳⵍⴰ.
ⵎⴽⴷⴰ ⵔⴰⴷ ⵢⵉⵍⵉ, ⴳ ⵓⴳⵎⵎⴰⴹ, ⵓⵙⵏⵎⴰⵍⴰ ⵏ ⴽⵕⴰⴹ ⵏ ⵉⵎⵓⴳⴰⵔ ⵉⵥⵍⵉⵏ ⵙ ⵓⵙⵏⵎⵍ ⵙ ⵓⵙⵇⵇⵉⵎ ⵙ ⵜⵖⴰⵔⴰⵙⵜ ⵏ ⵜⵥⵍⴰⵢⵉⵏ ⵏⵏⵙ ⴷ ⵓⵎⵢⴰⵙⵙⴰ ⵏⵏⵙ ⴷ ⵜⵏⴱⴰⴹⵉⵏ ⴷ ⵜⵎⵔⵙⴰⵍ ⵜⵉⴷⵙⵜⴰⵔⵉⵏ, ⴷ ⵜⴱⵣⴰⵔⵜ ⵏ ⵉⵙⵇⵇⵉⵎⵏ ⵉⵏⵎⵏⴰⴹⵏ ⵏ ⵉⵙⵉⴹⵏⵏ ⴳ ⵓⵙⵖⵓⴷⵓ ⵏ ⵓⵙⵡⵓⴷⴷⵓ ⵏ ⵉⵙⴰⵢⵔⴰⵔⵏ ⴷ ⵉⵎⵉⵡⴰ ⴷ ⵓⵙⵔⵓⵙ ⵏ ⵜⵓⵙⵓⵔⵜ ⴳ ⵓⵙⵡⵉⵔ ⵏ ⵓⵙⵡⵓⴷⴷⵓ ⴰⵎⵓⵔⴰⵏ, ⴰⵡⴷ ⵢⴰ ⵓⵎⴰⴳⵔ ⵉⵥⵍⵉⵏ ⵙ ⵉⵎⵔⵙⵉ ⵏ ⵡⵓⴹⵓⴼ ⴷ ⵓⵙⵎⴽⵍ ⵏ ⵉⵙⵉⵡⴹⵏ ⵏ ⵉⵏⵎⵓⵔⴰⵏ ⴷ ⵜⵏⵎⵓⵔⴰ ⵉ ⵜⵙⵏⴱⴹⴰⵢⵉⵏ ⵜⵉⵥⵕⴼⴰⵏⵉⵏ.
ⴳ ⵓⵙⴰⵜⵉ ⵏ ⵜⵡⵓⵔⵉ ⵉⵙⵙⵓⵔⵏ ⴰⴽⴷ ⵙⵇⵇⵉⵎ ⴰⵏⴰⴼⵍⵍⴰ ⵏ ⵜⵏⴱⴰⴹⵜ ⵜⴰⵏⵣⵔⴰⴼⵜ ⴷ ⵜⵏⵙⵙⵉⵅⴼⵜ ⵏ ⵜⵎⵓⵔⴰⵢⵜ ⵜⴰⵎⴰⵜⴰⵢⵜ, ⴰⵔ ⵉⴷⵔⵔⵓ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵓⵙⵎⵓⵙⵙⵓ ⵏ ⵢⴰⵜ ⵜⵉⵏⴰⵡⵜ ⵅⴼ ⵓⵙⵖⵓⴷⵓ ⵏ ⵜⵓⴷⵔⵜ ⵜⴰⵎⴰⵜⴰⵢⵜ.
ⵙ ⵜⵎⵍⴷⴰ ⴰⴷ, ⴰⴷ ⵉⴼⵙⵔ ⵓⵙⵇⵇⵉⵎ ⴳ ⵓⴳⵎⵎⴰⴹ ⵏⵏⵙ ⵎⵏⵏⴰⵡⵜ ⵜⵥⵕⵉⴳⵉⵏ ⵏ ⵜⵙⵏⴱⴹⴰⵢⵉⵏ ⵜⵉⵥⵕⴼⴰⵏⵉⵏ, ⵉⴳⴰⵏ ⵜⴰⵏⴰⴹⵉⵏ ⵜⵉⵙⴳⵯⵙⴰⵏⵉⵏ ⴷ ⵜⴰⵏⴰⴹⵉⵏ ⵜⵉⵙⴳⵓⵎⴰⵏⵉⵏ ⴷ ⵜⵖⵜⴰⵙⵉⵏ ⴷ ⵉⴱⴹⵉⵢⵏ ⵏⵏⴰ ⵙⵙⵓⴼⵖⵏⵜ ⵜⵙⵏⴱⴹⴰⵢⵉⵏ ⴰⴷ ⴳ ⵓⵙⴰⵜⵉ ⵏ ⵜⵥⵍⴰⵢⵉⵏ ⵏⵏⵙⵏⵜ ⵜⵉⵏⵣⵔⴰⴼⵉⵏ, ⴰⵡⴷ ⵢⴰⵏ ⵓⵎⴰⵏⴰⵔ ⴰⵎⵓⵟⵟⵓⵏ ⵏ ⵜⵥⵕⵉⴳⵉⵏ ⵜⵉⵏⴼⵔⴰⵔⵉⵏ ⵏ ⵜⵙⵏⴱⴹⴰⵢⵉⵏ ⵜⵉⵥⵕⴼⴰⵏⵉⵏ ⵙⴳ ⵓⵙⴳⴳⵯⴰⵙ ⵏ 2003.
ⵜⵓⴷⴼ ⵜⴷⵔⴰⵡⵜ ⵏ ⵓⵙⵇⵇⵉⵎ ⴳ ⵓⵏⵎⵓⵇⵇⴰⵔ ⴰⴷ ⴰⴷⵍⵙⴰⵏ ⴰⴳⵔⴰⵖⵍⴰⵏ, ⴳ ⵜⵉⴽⴽⵍⵜ ⵜⵉⵙ ⵙⵏⴰⵜ ⵙ ⵓⵎⵎⴹⴼⴰⵕ, ⴳ ⵓⵎⵏⴰⴹ ⵏ ⵓⵙⵎⵀⵍ ⵏ ⵜⵙⵜⵔⴰⵜⵉⵊⵉⵜ ⵏ ⵓⵎⵢⴰⵡⴰⴹ ⵏ ⵜⵙⵏⴱⴹⴰⵢⵉⵏ ⵜⵉⵥⵕⴼⴰⵏⵉⵏ, ⵏⵏⴰ ⵉⵙⵔⵓⵙⵏ ⵢⴰⵜ ⵜⵊⵊⵍⵜ ⵜⴰⵎⴰⵢⵏⵓⵜ ⵉⴱⴷⴷⵏ ⵅⴼ ⵓⵏⵏⵓⵕⵥⵎ ⵅⴼ ⵜⴼⵓⵍⵉⵏ ⵜⵉⵎⵏⵜⴰⵢⵉⵏ ⵙ ⵜⵖⴰⵔⴰⵙⵜ ⵏ ⵓⵙⴳⵓⴷⵉ ⵏ ⵉⴱⵔⴷⴰⵏ ⵏ ⵜⴷⵔⴰⵡⵜ ⵜⴰⵏⵎⵓⵔⵉⵜ, ⴷ ⵓⵙⴷⵓⵙ ⵏ ⵜⵣⴷⴳⵉ ⴷ ⵜⵙⵓⵙⵖⵜ ⴷ ⵓⵙⵇⵙⵉ ⴳ ⵜⵎⵓⵔⵜ ⵏⵏⵖ.
