ⵜⵙⵙⵉⵅⴼ ⵎⴰⵙⵙⴰ ⵣⵉⵏⴱ ⵍⵄⴰⴷⴰⵡⵉ, ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⴷ ⵎⴰⵙⵙ ⵅⴰⵍⵉⴷ ⴰⵃⵎⴰⴷ ⵛⴰⴽⵛⴰⴽ, ⴰⵏⵙⵙⵉⵅⴼ ⵏ ⵓⴱⵔⵙⵉⵔⴰ ⵏ ⵜⵎⵙⵙⵉⴹⵏⵜ ⴳ ⵍⵉⴱⵢⴰ, ⴳ ⵡⴰⵙⵙ ⵏ ⵡⴰⴽⵕⴰⵙ 05 ⵢⵓⵏⵢⵓ 2024 ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⵜⵉⵡⵓⵔⵉⵡⵉⵏ ⵏ ⵓⵙⴳⵎⴹ ⵏ ⵜⵎⵙⵙⴽⵜⵉⵜ ⵏ ⵓⵏⵔⴰⵎⴰⵙ ⵉⵙⵎⵓⵏⴰⵏ ⵙⵏⴰⵜ ⵏ ⵜⵎⵔⵙⴰⵍ ⴰⴷ, ⴳ ⵢⴰⵜ ⵜⵙⵓⵔⵉⴼⵜ ⵉⵎⵎⴰⵍⵏ ⵜⵉⵔⴰⵜ ⵉⵙⵙⵓⵔⵏ ⵏ ⵙⵏⴰⵜ ⵏ ⵜⴼⵓⵍⵉⵏ ⵜⴰⴼⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵓⵎⵢⴰⵡⴰⵙ ⴳ ⵢⵉⴳⵔ ⵏ ⵓⴳⴳⵉⵡⵙ ⵏ ⵓⵥⵕⴼ ⴰⴳⴷⵓⴷⴰⵏ.
ⵜⵙⴰⵡⵍ ⵜⵎⵙⵙⴽⵜⵉⵜ ⵅⴼ ⵓⵣⴷⴷⵓⵢ ⵏ ⵜⵓⴳⴳⴰⵙ ⵏ ⵙⵏⴰⵜ ⵏ ⵜⴼⵓⵍⵉⵏ ⴳ ⵓⵙⴱⵓⵖⵍⵓ ⵏ ⵜⵙⵏⵜⴰⵢⵉⵏ ⵏ ⵓⵎⵢⴰⵡⴰⵙ ⵉⴷⵓⵙⵏ ⵉⵡⴰⵜⵜⵙⵏ ⴰⴱⵟⵟⵓ ⵏ ⵉⵡⵏⴳⵎⵏ ⴷ ⵜⵔⵎⵉⵜⵉⵏ ⴷ ⵡⵓⵎⵍⴰⵏ, ⴷ ⵓⵙⵖⵓⵏ ⵙ ⵡⴰⵏⵏⴰⵍ ⵏ ⵓⵎⵢⴰⵡⴰⵙ ⴰⵜⵉⵇⵏⵉ ⵙ ⵜⵖⴰⵔⴰⵙⵜ ⵏ ⵓⵎⵎⵙⴽⴰⵍ ⵏ ⵉⵎⴰⵙⵙⵏ ⴷ ⵜⴱⵔⵉⴷⵉⵏ ⵏ ⵜⵡⵓⵔⵉ, ⵉⵎⵙⴰⵙⴰⵏ ⴷ ⵉⵙⴱⴷⴰⴷⵏ ⵉⴳⵔⴰⵖⵍⴰⵏⵏ, ⴰⵡⴷ ⴰⵙⴷⵓⵙ ⵏ ⵜⵣⵎⵎⴰⵔ ⵜⵉⵣⵣⵓⵍⴰⵏⵉⵏ ⴷ ⵓⵙⵙⴱⵖⵔ ⵏ ⵉⵖⴰⵡⴰⵙⵏ ⵏ ⵓⵙⴰⵏⵓⵏ ⵉⵍⵍⴰⵏ ⵖⵔ ⵙⵏⴰⵜ ⵏ ⵜⴼⵓⵍⵉⵏ.
ⴳ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⴰⴷ, ⵜⵙⴷⴷⵉⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵉⵙ ⵉⴳⴰ ⵓⵎⵢⴰⵡⴰⵙ ⵢⴰⵏ ⵢⵉⵎⵉⵙ ⵉⵜⵜⴰⵊⵊⴰⵏ ⵙⵉⵏ ⵉⴳⵔⴰⵡⵏ ⴰⴷ ⴱⴱⴷⵏ ⵎⵏⵉⴷ ⵏ ⵜⴱⴱⴰⵢⴹⴰⵕⵉⵏ ⴷ ⵜⵏⵥⴰⵕ ⵉⴳⵎⴰⵏ, ⵙ ⵓⵙⴱⵓⵖⵍⵓ ⵏ ⵉⵎⴰⵙⵙⵏ ⵏ ⵜⵡⵓⵔⵉ ⴳ ⵢⵉⴳⵔ ⵏ ⵜⵙⵎⵓⵟⵟⵓⵏⵜ ⴷ ⵜⴳⵎⵉ ⵜⴰⵙⵓⵍⴰⵏⵜ ⵙ ⵜⵉⴽⴽⵉ ⵏ ⵜⵉⵣⵉ ⵉ ⵓⴳⴰⵏⵉ ⵏ ⵇⴰⵃ ⵜⵉⵎⵏⵜⴰⵢⵉⵏ, ⴷⴰⵢ ⵜⵏⵏⴰ ⴳ ⵓⵙⴰⵜⵉ ⴰⴷ ⵉⵙ ⵍⵍⵉⴳ ⵉⵙⵙⵓⵔⴼ ⵓⵙⵇⵇⵉⵎ ⵙⵏⴰⵜ ⵏ ⵜⵙⵓⵔⵉⴼⵉⵏ, ⵜⴰⵎⵣⵡⴰⵔⵓⵜ ⴷ ⵜⴰⵎⵔⵙⴰⵍⵜ ⴷ ⵜⵉⵙ ⵙⵏⴰⵜ ⵜⴱⴷⴷ ⵅⴼ ⵜⵎⵙⴽⵔⵜ ⵏ ⵓⴳⴳⵉⵡⵙ, ⵢⵉⵡⴹ ⵙ ⵢⴰⵜ ⵜⵊⵊⵍⵜ ⵜⴰⵎⴰⵢⵏⵓⵜ, ⵉⵜⵜⴽⴰⵎⴰⴷⵏ ⴳⵉⵙ ⴰⵡⵜⵜⴰⵙ ⴰⵎⴰⵜⵜⴰⵢ ⵉⴳⴰⵏ ⴰⵙⵔⵓⵙ ⵏ ⵜⵓⵙⵓⵔⵜ ⴳ ⵜⵓⴷⵔⵜ ⵏ ⵉⵏⵎⵓⵔⴰⵏ ⵙ ⵜⵖⴰⵔⴰⵙⵜ ⵏ ⵜⴼⵍⵍⴰⵡⵉⵏ ⵏ ⵓⵙⵇⵇⵉⵎ ⴷ ⵉⵙⵖⵍⴰⴼ ⵏⵏⵙ.
ⵙⴳ ⵜⵏⵉⵍⴰ ⵏⵏⵙ, ⵉⵙⵙⵓⵜⴳ ⵎⴰⵙⵙ ⴰⵏⵙⵙⵉⵅⴼ ⵏ ⵓⴱⵔⵙⵉⵔⴰ ⵏ ⵜⵎⵙⵙⵉⴹⵏⵜ ⵏ ⵍⵉⴱⵢⴰ ⴰⴷⵖⴰⵔ ⵉⵖⵓⴷⴰⵏ ⵉⵍⵍⴰⵏ ⵖⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⴷ ⵉⴼⴼⵖⵏ ⵙⴳ ⵜⵓⵙⵓⵔⵜ ⵏⵏⴰ ⵙⴽⴰⵔⵏⵜ ⵜⵙⵎⵉⴳⴰⵍ ⵏ ⵓⴳⴳⵉⵡⵙ ⵏⵏⴰ ⵉⵜⵜⴳⴳⴰ ⴳ ⵜⵕⵡⵉ ⵏ ⵓⵙⵡⵓⴷⴷⵓ ⴰⴳⴷⵓⴷⴰⵏ, ⴷⴰⵢ ⵉⵙⵙⵉⵡⵍ ⵅⴼ ⵓⵏⴰⵔⵓⵣ ⵏⵏⵙ ⵙ ⵎⴰ ⵖⴰ ⵉⴼⴽⴰ ⵓⴷⵔⴰⵡ ⴰⴷ ⵉ ⵙⵉⵏ ⵉⴳⵔⴰⵡⵏ.
ⴰⵀⴰ ⵙⴷⴷⵉⴷⵏ ⵙⵏⴰⵜ ⵏ ⵜⴼⵓⵍⵉⵏ ⵜⴰⵙⵓⵔⵉⴼⵜ ⵏⵏⵙⵏ ⵖⵔ ⵢⴰⵏ ⵓⵎⵢⴰⵙⵙⴰ ⵏ ⵓⵎⵢⴰⵡⴰⵙ ⴷ ⵓⴷⵔⴰⵡ ⴰⵙⵓⵍⴰⵏ, ⴷ ⵓⵙⵖⵓⵏ ⵏⵏⵙⵏ ⵙ ⵡⵓⴹⵓⴼ ⵏ ⵇⴰⵃ ⵜⵉⵙⵏⵜⴰⵢⵉⵏ ⵉⵥⴹⴰⵕⵏ ⴰⴷ ⴱⵣⵔⵏⵜ ⴳ ⵜⵡⵉⵙⵉ ⵏ ⵜⵏⵓⴼⴰ ⵉⵙⵙⵓⵔⵏ ⵏ ⵙⵏⴰⵜ ⵏ ⵜⴼⵓⵍⵉⵏ.
ⵢⵓⵙⴰ ⴷ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵜ ⴰⴷ ⵍⵍⵉⴳ ⴷⵓⵙⵏ ⵉⵎⵢⴰⵙⵙⴰⵜⵏ ⵏ ⵜⴰⵡⵎⴰⵜ ⵏⴳⵔ ⵜⴳⵍⴷⵉⵜ ⵜⴰⵎⵖⵔⵉⴱⵉⵜ ⴷ ⵓⵡⴰⵏⴽ ⵏ ⵍⵉⴱⵢⴰ, ⴷ ⵜⵉⵔⴰⵜ ⵏ ⵓⵙⵢⵉⵡⵏ ⵏ ⵜⵓⴳⴳⴰⵙ ⵜⴰⴼⴰ ⴰⴷ ⵜⵉⵍⵉ ⵜⵏⴽⵔⴰ ⵙ ⵜⵡⵓⵔⵉ ⵏ ⵓⴳⴳⵉⵡⵙ, ⴷ ⵓⵙⴱⴷⴷⵉ ⵏ ⵜⵏⵥⴰⵕ ⵉⵙⵙⵓⵔⵏ, ⵙ ⵎⴰⴷ ⵉⵥⴹⴰⵕⵏ ⴰⴷ ⵉⵙⵙⴷⵓⵙ ⵉⵎⵏⵣⴰⵢⵏ ⵏ ⵜⵙⵓⵙⵖⵜ ⴷ ⵜⵎⵙⵙⵉⴹⵏⵜ ⴷ ⵜⵏⵏⵓⴱⴹⴰ ⵉⵀⵢⵢⴰⵏ ⴳ ⵓⵙⵡⵉⵔ ⵏ ⵙⵉⵏ ⵉⵡⴰⵏⴽⵏ ⴰⴷ.