ⵉⵙⵏⵓⴱⴳ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⴳ ⵓⵙⵙⴰⵏ ⵏ 03 ⴷ 04 ⵢⵓⵏⵢⵓ ⴰⴷ ⴳ ⵕⵕⴱⴰⵟ, ⵢⴰⵜ ⵜⵉⵏⴰⵡⵜ ⵅⴼ ⵉⵎⵔⵙⵉ "ⵜⴰⵙⵉⵎⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ" ⵍⵍⵉ ⵜⵙⵏⵎⴰⵍⴰ ⵜⵙⵏⵜⴰⵢⵜ ⵏ ⵜⴳⵎⵉ ⵏ ⵉⵏⵜⵓⵙⴰⵢ (IDI), ⵙ ⵜⴷⵔⴰⵡⵜ ⵏ 14 ⵏ ⵓⴳⵔⴰⵡ ⴰⴳⵎⴰⵎ ⵏ ⵓⴳⴳⵉⵡⵙ ⴳ ⵜⵎⴰⴷⴷⴰⵙⵜ ⵜⴰⵄⵕⴰⴱⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ (ⴰⵕⴰⴱⵓⵙⴰⵢ), ⴰⵡⴷ ⵉⴱⵕⵍⴰⵎⴰⵏⵉⵢⵏ ⵙⴳ ⵉⵡⴰⵏⴽⵏ ⵏ ⵉⴳⵔⴰⵡⵏ ⵉⵎⴷⵔⴰⵡⵏ.
ⵜⵡⴰⵜⵜⵙ ⵜⵉⵏⴰⵡⵜ ⴰⴷ ⴰⵙⵏⵄⵜ ⵏ ⵜⵉⵍⴰⵍⵜ ⵏ ⵓⵣⴷⴷⵓⵢ ⴰⵎⵔⵙⴰⵍ, ⵍⵓⵎⵎⵏ ⴰⴽⴷ ⵜⵏⴱⴰⴹⵜ ⵜⵓⵣⵔⵉⴼⵜ, ⴳ ⵢⵉⴳⵔ ⵏ ⵜⴹⴼⵕⵉ ⵏ ⵓⵣⵣⴳⵉⵔ ⵏ ⵉⵙⵖⵍⴰⴼ ⵏⵏⴰ ⵙⵙⵓⴼⵖⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ, ⴷ ⵜⵎⴰⵎⴽⵜ ⵏ ⵓⵙⴱⵓⵖⵍⵓ ⵏ ⵓⵎⵢⴰⵡⴰⵙ ⴰⴳⵔⴰⵖⵍⴰⵏ ⴷ ⵓⵎⵎⵙⴽⴰⵍ ⵏ ⵜⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⵏⴳⵔ ⵉⴳⵔⴰⵡⵏ ⴷ ⵉⵛⵔⵉⴽ ⵜⴰⴼⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵙⵎⵉⴳⵍⵜ ⵏ ⵉⴳⵔⴰⵡⵏ ⴰⴷ ⴳ ⵓⴹⴰⴽⴰⵍ ⵏ ⵜⵙⵓⵙⵖⵜ ⴷ ⵓⵙⵇⵙⵉ ⴷ ⵜⵕⵡⵉ, ⴰⵍⵍⵉⴳ ⵜⵉⵍⵉ ⵜⵙⵖⵣⵏⵜ ⵏ ⵓⵙⵏⵜⵉ ⴰⴳⵔⴰⵖⵍⴰⵏ ⵏ ⵜⵙⵉⵎⴰⵏⵜ ⵏⵏⵙⵏ, ⵏⵏⴰ ⵎⵓ ⵜⵕⵥⵎ ⵜⵙⵏⵜⴰⵢⵜ ⵏ ⵜⴳⵎⵉ ⵏ ⵉⵏⵜⵓⵙⴰⵢ, ⵙ ⵓⵎⵢⴰⵡⴰⵙ ⴷ ⵜⵎⴰⴷⴷⴰⵙⵜ ⵏ ⵓⵎⵢⴰⵡⴰⵙ ⴰⴷⵎⵙⴰⵏ ⴷ ⵜⴳⵎⵉ ⴷ ⵓⴼⵏⵉⵇ ⴰⴳⵔⴰⵖⵍⴰⵏ ⵏ ⵓⴷⵔⵉⵎ.
ⵙ ⵜⵎⵍⴷⴰ ⴰⴷ, ⵜⵙⴷⴷⵉⴷ ⵎⴰⵙⵙⴰ ⵣⵉⵏⴱ ⵍⵄⴰⴷⴰⵡⵉ, ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⵉⵙ ⵉⵍⴰ ⵉⵎⵔⵙⵉ ⵏ ⵜⵉⵏⴰⵡⵜ ⵢⴰⵜ ⵜⵎⵙⵔⵓⵙⵜ ⵜⴰⵎⵇⵔⴰⵏⵜ, ⴳ ⵜⵉⵣⵉ ⵏ ⵓⴱⵓⵖⵍⵓ ⴰⵏⴼⵔⴰⵔ ⵉⵍⵍⴰⵏ ⴳ ⵓⵙⵡⵉⵔ ⵏ ⵓⵙⴰⵜⵉ ⴰⵏⴰⵡⴰⵢ ⴰⴳⵔⴰⵖⵍⴰⵏ ⵏ ⵜⵙⵉⵎⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ. ⵙ ⵜⵓⴳⴷⵓⵜ ⵏ ⵓⵢⴰⴷ, ⵜⵏⵏⴰ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵉⵙ ⵍⵍⴰⵏⵜ ⴽⵔⴰ ⵏ ⵜⵏⵥⴰⵕ ⴷ ⵉⵎⵉⵣⴰⵏ ⵉⵡⴰⵍⴰⵏ ⴰⵙⵎⵀⵍ ⵏⵏⵙ, ⴷⴰⵢ ⵜⵖⵔⴰ ⵖⵔ ⵡⴰⵎⵎⴰⵥ ⵏ ⴽⵔⴰ ⵏ ⵜⵎⵢⴰⴷⴰⵙⵉⵏ ⵜⵉⵎⴰⵢⵏⵓⵜⵉⵏ ⵜⵉⵎⵖⴰⵡⵍⵉⵏ ⵉⵕⵡⴰⵏ ⵎⵍⵉⵃ ⴳ ⵓⵎⵔⴰⵔⴰ ⵏ ⵉⴳⵔⴰⵡⵏ ⴰⴷ ⴰⴽⴷ ⵜⵎⵙⵍⴰⵢⵜ ⵏ ⵜⵙⵉⵎⴰⵏⵜ, ⴷ ⵡⴰⵎⵎⴰⵥ ⵏ ⵜⵙⵏⵜⴰⵢⵉⵏ ⵜⵓⵛⵛⵉⵍⵉⵏ ⴳ ⵓⵣⵎⵣ ⴷ ⵢⵓⵙⴰⵏ ⴳ ⵢⵉⴳⵔ ⴰⴷ. ⵎⴽⴷⴰ ⵜⵙⵙⵉⵙⴼⵉⵡ ⴰⵍⵜⴰⵖ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳ ⵜⴰⵏⵏⴰⵢⵜ ⴰⴷ, ⵃⵎⴰ ⴰⴷ ⵉⴱⴷⴷ ⵅⴼ ⵓⵙⴷⵓⵙ ⵏ ⵡⵓⵎⵎⵉⵥⵏ ⵏ ⵓⴳⴳⵉⵡⵙ ⵢⴰⵜⵜⵓⵢⵏ ⵏ ⵓⵥⵕⴼ ⴰⴳⴷⵓⴷⴰⵏ ⴳ ⵢⵉⴳⵔ ⵏ ⵜⵙⵉⵎⴰⵏⵜ.
ⵎⴽⴷⴰ ⵢⵓⵍⵖ ⵎⴰⵙⵙ ⵄⴱⴷ ⵍⵃⴰⴽⵉⵎ ⴱⵏ ⵍⵥⵕⵇ , ⴰⴳⵏⵙⴰⵙ ⵏ ⵜⵙⵏⵜⴰⵢⵜ ⵏ ⵜⴳⵎⵉ ⵏ ⵉⵏⵜⵓⵙⴰⵢ, ⴰⵙⵜⴰⵢ ⵏ ⵉⵎⵔⵙⵉ ⵏ ⵜⵉⵏⴰⵡⵜ, ⴷⴰⵢ ⵉⵙⴷⴷⵉⴷ ⵉⵙ ⵜⴳⴰ ⵜⵙⵓⵔⵉⴼⵜ ⵏ ⵜⵙⵓⵍⵜ ⵏ ⵓⵎⴹⴰⴽⴰⵕ ⵏⵏⴰ ⵉⵏⵜⴰⵏ ⴰⵣⵖⴰⵜ ⴳ ⴷⴷⴰⵡⵃⴰ ⵅⴼ ⵜⵎⴰⵎⴽⵜ ⵏ ⵜⵡⵓⵔⵉ ⵉⵙⵙⵓⵔⵏ ⴰⴽⴷ ⵜⴼⵓⵍⵉⵏ ⵜⵉⵎⵏⵜⴰⵢⵉⵏ, ⵣⵣⵉⴳⵙⵏⵜ ⴰⴱⵕⵍⴰⵎⴰⵏ, ⵜⴰⴼⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵙⵉⵎⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴳ ⵓⵎⴰⴹⴰⵍ ⴰⵄⵕⴰⴱ, ⴰⵀⴰ ⵉⵙⴷⴷⵉⴷ ⵉⵙ ⵜⴳⴰ ⵜⵙⵉⵎⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⵙⴳ ⵜⵔⵙⴰⵍ ⵏ ⵜⵓⵚⴽⴰ ⵏ ⵜⵎⵢⵉⵎⴰⵏⵜ ⵏ ⵓⴳⴷⵓⴷ ⴳ ⵜⴼⵍⵍⴰⵡⵉⵏ ⵏⵏⵙ ⵏ ⵓⴳⴳⵉⵡⵙ.
ⵙⴳ ⵜⵏⵉⵍⴰ ⵏⵏⵙ, ⵉⵏⵏⴰ ⵓⵏⴼⵍⵓⵙ ⴰⵎⴰⵜⴰⵢ ⵙ ⵜⵎⵓⵔⴰⵢⵜ ⵏ ⵜⵎⴰⴷⴷⴰⵙⵜ ⵜⴰⵄⵕⴰⴱⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ (ⴰⵕⴰⴱⵓⵙⴰⵢ), ⵎⴰⵙⵙ ⵃⴰⵜⵉⵎ ⴱⵏ ⴷⴷⵡⴰⴷⵉ ⵙⵙⴰⵍⵉⵏⵉ ⵉⵙ ⵉⴳⴰ ⵓⵙⴷⵓⵙ ⵏ ⵜⵙⵉⵎⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ ⴰⵙⵉⵣⵡⵔ ⴰⵙⵜⵔⴰⵜⵉⵊⵉ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ (ⵉⵏⵜⵓⵙⴰⵢ). ⴷⴰⵢ ⵉⵙⴷⴷⵉⴷ ⵉⵙ ⵜⴳⴰ ⵜⵉⵏⴰⵡⵜ ⵢⴰⵜ ⵜⵎⵍⴷⴰ ⵏ ⵓⵙⴷⵓⵙ ⵏ ⵓⵎⵔⴰⵔⴰ ⵏⴳⵔ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴷ ⵓⴱⵕⵍⴰⵎⴰⵏ ⴳ ⵜⵙⴳⴰ ⵏ (ⴰⵕⴰⴱⵓⵙⴰⵢ), ⴷ ⴰⴷ ⵜⵙⵙⵉⵡⴹ ⵖⵔ ⵜⵡⴰⴼⵉⵜ ⵏ ⵉⵎⴰⵙⵙⵏ ⵉⵕⵡⴰⵏ ⵏ ⵜⴹⴼⵕⵉ ⵏ ⵓⵣⵣⴳⵉⵔ ⵏ ⵉⵙⵖⵍⴰⴼ, ⵙ ⵎⴰⴷ ⵉⴼⵔⵔⵓⵏ ⴰⵙⵔⵓⵙ ⵏ ⵡⴰⵜⵉⴳ ⵉⵔⵏⴰⵏ ⵏ ⵜⵡⵓⵔⵉⵡⵉⵏ ⵏ ⵉⴳⵔⴰⵡⵏ ⴰⴷ.
ⵉⵇⵇⴰⵏ ⴷ ⵓⴱⴷⴰⵔ ⵉⵙ ⵜⵍⵖⵏ ⵜⵙⵉⵎⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴷ ⵜⵎⵙⵙⵉⴹⵏⵜ ⵉ ⴽⵔⴰ ⵏ ⵉⵙⴱⴷⴰⴷⵏ ⵉⴳⵔⴰⵖⵍⴰⵏⵏ ⵏⵏⴰ ⵉⵙⵙⵓⵜⵓⵢⵏ ⴰⵙⵎⵀⵍ ⵏⵏⵙ ⴳ ⵢⵉⴳⵔ ⴰⴷ, ⵍⵓⵎⵎⵏ ⵏⵏⴰ ⵉⵣⴷⵉⵏ ⴷ ⵉⵎⵏⵣⴰⵢⵏ ⵏ ⵓⵍⵖⵓ ⵏ ⵎⵉⴽⵙⵉⴽⵓ ⴷ ⵍⵉⵎⴰ.