ⴳ ⵜⴳⵓⵔⵉ ⵏⵏⴰ ⵜⵖⵔⴰ ⵙ ⵜⵎⵍⴷⴰ ⴰⴷ, ⵜⵙⵙⵉⵡⵍ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵅⴼ ⵓⴱⵓⵖⵍⵓ ⵉⵏⵎⴰⵍⴰⵏ ⵏ ⵓⵙⴷⴷⵉ ⵏ ⵓⵙⴷⵓⵙ ⵏ ⵜⵙⵓⵙⵖⵜ ⵏⵏⴰ ⵉⴹⴼⴰⵕ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ, ⵉⴱⴷⴷⵏ ⵅⴼ ⵢⴰⵏ ⵓⵙⴰⵜⵉ ⴰⴷⵙⵜⴰⵔ ⴷ ⵡⵓⵣⵔⵉⴼ ⵉⴷⵓⵙⵏ. ⵎⴽⴷⴰ ⵜⵙⵙⵉⵡⵍ ⵅⴼ ⵉⴱⵖⵓⵔⵏ ⵏ ⵓⵏⵏⵓⵕⵥⵎ ⵏ ⵓⵙⵇⵇⵉⵎ ⵅⴼ ⵓⵏⵎⵉⵍⴰ ⵏⵏⵙ, ⵏⵏⴰ ⵉⴳⴰⵏ ⴰⵙⴷⵓⵙ ⵏ ⵜⵕⵡⵉ ⵏ ⵓⵙⵇⵇⵉⵎ ⴷ ⵓⵙⵖⵓⴷⵓ ⵏ ⵓⵙⵎⵀⵍ ⵏ ⵉⵙⵖⵍⴰⴼ ⵏⵏⵙ ⴷ ⵜⵓⵙⵓⵔⵜ ⵏ ⵜⴹⴼⵕⵉⵡⵉⵏ ⵏⵏⵙ ⵜⵉⵏⵣⵔⴰⴼⵉⵏ, ⴰⵡⴷ ⴰⴱⵣⴰⵔ ⴳ ⵓⵎⴹⴰⴽⴰⵕ ⴰⴷⵉⵎⵓⵇⵕⴰⵟⵉ ⴰⵏⴰⵎⵓⵔ.
ⴷⴰⵢ ⵜⵙⵏⵄⵜ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ, ⵙⴳ ⵜⵙⴳⴰ ⵢⴰⴹⵏ, ⵜⴰⵣⵣⵉⴳⵣⵜ ⵏⵏⴰ ⵖⵔ ⵢⵉⵡⴹ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵓⵙⵡⵉⵔ ⵏ ⵓⵎⵢⴰⵡⴰⴹ, ⵜⵙⴷⴷⵉⴷ ⴰⵜⵉⴳ ⵏ ⵜⵖⵔⵉ ⵏ ⵜⴰⵏⴰⴹⵉⵏ ⵏⵏⴰ ⴷ ⵉⵙⵙⵓⴼⵖ ⵓⵙⵔⵓⵙ ⵏ ⵉⵎⴰⵙⵙⵏ ⵉⵜⵜⵓⵙⵏⴼⵍⵓⵍⵏ ⵉ ⵓⵎⵢⴰⵡⴰⴹ, ⵜⴰⴼⴰ ⴰⴷ ⵢⵉⵍⵉ ⵓⴱⵣⴰⵔ ⴳ ⵓⵙⵔⵓⵙ ⵏ ⵜⵓⵙⵓⵔⵜ ⴷ ⵓⵙⴷⵓⵙ ⵏ ⵜⵎⵢⵉⵎⴰⵏⵜ ⵖⵔ ⵇⴰⵃ ⵜⵉⴼⵓⵍⵉⵏ, ⵣⵣⵉⴳⵙⵏ ⵉⵎⴰⵙⵙⵏ ⵏ ⵓⵙⵏⵖⵎⵙ ⴷ ⵉⵏⵎⵓⵔⴰⵏ.
ⵎⵇⵇⴰⵔ ⵡⴰⵍⴰⵏⵜ ⵜⵏⵥⴰⵕ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴳ ⵢⵉⴳⵔ ⴰⴷ, ⵜⵙⴷⴷⵉⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⴰⵙⵖⵓⵏ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵙ ⵓⵙⵜⴰⵢ ⵏ ⵢⴰⵜ ⵜⵖⴰⵔⴰⵙⵜ ⵉⵏⵎⴰⵍⴰⵏ ⴳ ⵓⵎⵢⴰⵡⴰⴹ ⵉⵣⵔⴽⵏ ⴰⵎⵢⴰⵙ ⵏⴳⵔ ⵜⵙⵓⵙⵖⵜ ⴷ ⵜⵏⵏⵓⵜⵍⴰ ⵉⵅⵚⵚⴰⵏ ⴰⴷ ⵉⵍⵉⵏⵜ ⴳ ⵜⵙⵎⵉⴳⴰⵍ ⵏ ⵓⵙⵇⵇⵉⵎ ⴰⴷ.
ⵉⵇⵇⴰⵏ ⴷ ⵓⴱⴷⴰⵔ ⵉⵙ ⵉⴼⵙⵙⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵜⴰⵏⴰⴹⵉⵏ ⵏⵏⵙ ⵙ ⵓⵎⵙⴰⵙⴰ ⴷ ⵓⴷⵓⵙⵜⵓⵔ ⵏ ⵜⴳⵍⴷⵉⵜ, ⴷ ⴰⵔ ⵜⵜⵏⵓⵕⵥⵓⵎⵏⵜ ⵜⴰⵏⴰⴹⵉⵏ ⴰⴷ ⵅⴼ ⵓⵎⴰⵜⴰ ⵙ ⵜⵖⴰⵔⴰⵙⵜ ⵏ ⵜⵓⴳⵜⵜ ⵏ ⵉⵙⵓⵔⴰ, ⴳⵉⵙⵏ ⴰⵖⵎⵉⵙ ⴰⵎⴰⴷⴷⵓⴷ ⴷ ⵡⴰⵙⵉⵜ ⴰⵍⵉⴽⵟⵕⵓⵏⵉ ⵏ ⵓⵙⵇⵇⵉⵎ.