ⵉⵙⵏⵎⴰⵍⴰ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⴰⵙⵙ ⵏ ⵓⵙⵉⵏⴰⵙ 25 ⵢⵓⵏⵢⵓ 2024 ⴳ ⴹⴹⴰⵕⵍⴱⵉⴹⴰ, ⵢⴰⵜ ⵜⵙⵎⵓⵏⵉ ⵉ ⵉⴳⵎⴰⵎⵏ ⵏ ⵓⵙⴳⵔⴰⵡ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⵉⵍⴰⵏ ⵜⵉⵥⵍⴰⵢⵉⵏ ⵜⵉⵏⵣⵔⴰⴼⵉⵏ, ⵙ ⵜⵉⵍⵉⵜ ⵏ ⵜⵓⴳⵜⵜ ⵏ ⵉⵏⵙⵙⵉⵅⴼⵏ ⴷ ⵉⴳⵏⵙⴰⵙⵏ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⵉⵍⴰⵏ ⵜⵉⵥⵍⴰⵢⵉⵏ ⵜⵉⵏⵣⵔⴰⴼⵉⵏ, ⵙⴳ ⵉⵡⴰⵏⴽⵏ ⵉⴹⴼⴰⵕⵏ ⵜⴰⵎⵏⵥⴰⵡⵜ ⵏ ⵡⴰⴼⵔⵉⵇⵢⴰ ⴷ ⵓⵕⵓⴱⴱⴰ ⴷ ⵡⴰⵙⵢⴰ ⴷ ⵎⵉⵔⵉⴽⴰⵏ ⵜⴰⵍⴰⵜⵉⵏⵉⵜ, ⵜⴰⴼⴰ ⴷ ⵢⵉⵍⵉ ⵓⵙⴳⵎⴹ ⵏ ⵓⵏⴳⵔⴰⵡ ⴰⴷⵙⵍⴰⵏ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⵉⵍⴰⵏ ⵜⵉⵥⵍⴰⵢⵉⵏ ⵜⵉⵏⵣⵔⴰⴼⵉⵏ  (JURISAI).
ⴰⵔ ⴷ ⵜⴻⵜⵜⴰⵛⴽⴰ ⵜⵙⵎⵓⵏⵉ ⴰⴷ ⴳ ⵓⵙⴰⵜⵉ ⵏ ⵓⵙⵎⵀⵍ ⵏ ⵉⵙⴱⴷⴰⴷⵏ ⵏ ⵓⵍⵖⵓ ⵏ ⵕⵕⴱⴰⵟ, ⵏⵏⴰ ⵙⵙⴳⵎⴹⵏ ⵉⵎⴷⵔⴰⵡⵏ ⵏ ⵜⵙⵎⵓⵏⵉ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⵉⵍⴰⵏ ⵜⵉⵥⵍⴰⵢⵉⵏ ⵜⵉⵏⵣⵔⴰⴼⵉⵏ ⵏⵏⴰ ⵉⵙⵏⴱⴳⵉ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵓⵙⴰⴽⵓⴷ ⵏ 23 ⴱⵕⴰⵢⵕ 2024, ⵏⵏⴰ ⵉⴱⵔⵔⵃ ⵙⵔⵙ ⴰⵙⵉⵍⵉ ⵏ ⵓⵙⴰⵜⵉ ⵏ ⵓⵎⵢⴰⵡⴰⵙ ⵏⴳⵔ ⵉⴳⵔⴰⵡⵏ ⵉⵏⵣⵔⴰⴼⵏ ⵙⴳ ⵓⵙⴳⵔⴰⵡ ⵖⵔ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵉⵣⴷⵉⵏ ⴷ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ (INTOSAI), ⵙ ⵓⵎⵙⴰⵙⴰ ⴷ ⵓⵎⵏⵏⵉ 3 ⵏ ⵓⵏⴳⵔⴰⵡ ⵏⵏⵙ ⴰⴷⵙⵍⴰⵏ.
ⵎⵙⴰⵙⴰⵏ ⵉⵎⴷⵔⴰⵡⵏ ⵉⵙ ⴰⵙⵔⵙ ⵏ ⵜⵎⴰⴷⴷⴰⵙⵜ ⴰⴷ ⴰⵔ ⵉⵕⵥⵥⵎ ⵢⴰⵜ ⵜⵊⵊⵍⵜ ⵜⴰⵎⴰⵢⵏⵓⵜ ⵏ ⵓⵎⵢⴰⵡⴰⵙ ⵏⴳⵔ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⵉⵍⴰⵏ ⵜⵉⵙⵖⴰⵏ ⵜⵉⵏⵣⵔⴰⴼⵉⵏ ⵉⴱⴷⴷⵏ ⵅⴼ ⵓⵙⴷⵓⵙ ⵏ ⵜⵡⵓⵔⵉ ⵏ ⵓⴳⴳⵉⵡⵙ ⴳ ⵓⵎⵏⵉⴷ ⵏⵏⵙ ⴰⵏⵣⵔⴰⴼ ⴰⵡⴷ ⴰⵙⵓⵜⴳ ⵏⵏⵙ ⴷ ⵓⵙⵉⵍⵉ ⵏ ⵜⵕⵡⵉ ⵏⵏⵙ ⵜⴰⴼⴰ ⴰⴷ ⵥⴹⴰⵕⵏ ⵉⴳⵔⴰⵡⵏ ⴰⴷ ⵙⴽⵔⵏ ⵜⵉⵍⴰⵍ ⵏⵏⵙⵏ ⵉⵣⴷⵉⵏ ⴷ ⵓⵙⴷⵓⵙ ⵏ ⵜⵙⵓⵙⵖⵜ ⴷ ⵜⵎⵙⵙⵉⴹⵏⵜ ⴷ ⵓⴹⴰⴽⴰⵍ ⵏ ⵓⵙⵏⵍⵍⵉ ⵏ ⵓⵥⵕⴼ ⴰⴳⴷⵓⴷⴰⵏ.
ⵎⴽⴷⴰ ⵓⵍⵖⵏ ⵉⵎⴷⵔⴰⵡⵏ ⵜⵉⵍⴰⵍ ⵜⵉⵏⴼⵔⴰⵔⵉⵏ ⵏⵏⴰ ⵉⵙⴽⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⵉⴳⴰⵏ ⵙⴳ ⵉⴳⵔⴰⵡⵏ ⵉⴳⵎⴰⵎⵏ ⵉⵎⵙⵔⵙⵍⵏ ⵏ ⵓⵙⴳⵔⴰⵡ, ⴷ ⵜⵙⵏⵜⴰⵢⵉⵏ ⵏⵏⵙ ⵜⵉⵎⵣⴷⴰⵢⵉⵏ ⴷ ⵜⴱⵣⴰⵔⵜ ⵏⵏⵙ ⵉⵕⵡⴰⵏ ⴳ ⵇⴰⵃ ⵜⵉⵊⵊⵍⵉⵏ ⵏ ⵓⵙⵔⵓⵙ ⵏ ⵜⵔⵙⴰⵍ ⵏ ⵜⵎⴰⴷⴷⴰⵙⵜ ⴰⴷ. ⵎⴽⴷⴰ ⵓⵍⵖⵏ ⵜⴰⵙⵏⵜⴰⵢⵜ ⵏⵏⵙ ⵏ ⵓⵙⵏⵓⴱⴳ ⵏ ⵜⵙⵎⵓⵏⴰⵢ ⵜⵉⵙⵎⴰⵜⵜⴰⴳⵉⵏ ⵉⴼⴼⵖⵏ ⵙ ⵓⵙⵎⴰⵔ ⵏ ⵢⴰⵏ ⵓⵙⵏⵜⵉ ⵏ ⵓⵏⴳⵔⴰⵡ ⴰⴷⵙⵍⴰⵏ ⵏ ⵜⵎⴰⴷⴷⴰⵙⵜ ⵏ JURISAI.
ⴳ ⵓⵙⴰⵜⵉ ⵏ ⵜⵡⵓⵔⵉⵡⵉⵏ ⵏ ⵜⵙⵎⵓⵏⵉ ⴰⴷ, ⵜⵙⵏⵎⴰⵍⴰ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵣⵉⵏⴱ ⵍⵄⴰⴷⴰⵡⵉ ⵢⴰⵜ ⵜⵙⵎⵓⵏⵉ ⵏ ⵜⵡⵓⵔⵉ ⴰⴽⴷ ⵓⵏⴳⴳⵓ ⵏⵏⵙ ⵎⴰⵙⵙ ⴱⵢⵉⵔ ⵎⵓⵙⴽⵓⴼⵉⵜⵛⵉ, ⴰⵏⵙⵙⵉⵅⴼ ⴰⵎⵣⵡⴰⵔⵓ ⵏ ⵜⵙⵏⴱⴹⴰⵢⵜ ⵜⴰⴼⵕⴰⵏⵙⵉⵙⵜ ⵏ ⵉⵙⵉⴹⵏⵏ, ⴷⴰⵢ ⵉⵥⵍⵉ ⵓⵎⴰⴳⵔ ⴰⴷ ⵙ ⵓⵎⴹⴰⴽⴰⵕ ⴳ ⵉⴱⵔⴷⴰⵏ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵏⴳⵔ ⵙⵏⴰⵜ ⵏ ⵜⵎⵔⵙⴰⵍ ⴳ ⵉⴳⵔⴰⵏ ⵉⵍⴰⵏ ⴰⴽⴰⵎⴷ ⴰⵎⴰⵣⴰⵔ.