ⵜⴷⵔⴰ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⵡⵓⵔⵉⵡⵉⵏ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏ ⵓⴱⴽⴽⵉⴹ ⴰⵡⵏⴹⴰⵏ ⴷ ⵜⵉⵍⴰⵍⵜ ⵏ ⵜⵏⴱⴹⴰⵢⵜ ⴳ ⵓⵙⴱⴷⴷⵉ ⵏⵏⵙ, ⵏⵏⴰ ⵉⵜⵜⵓⵙⵏⵎⴰⵍⴰⵏ  ⴳ ⵎⵕⵕⴰⴽⵛ ⵏⴳⵔ 10 ⴷ 12 ⵢⵓⵍⵢⵓⵣ 2024, ⵙ ⵜⵎⵍⴷⴰ ⵏ ⵓⴳⵔⴰⵡ ⵡⵉⵙ ⵙⴰ ⴷ ⵎⵔⴰⵡ ⵏ ⵜⵎⵙⵎⵓⵏⵜ ⵏ ⵉⵎⵓⵔⴰ ⵉⴳⴷⵓⴷⴰⵏⵏ ⵉⴼⵔⵉⵇⵉⵢⵏ.
ⴳ ⵜⴳⵓⵔⵉ ⵏⵏⴰ ⵜⵖⵔⴰ ⵙ ⵜⵎⵍⴷⴰ ⴰⴷ, ⵜⵙⵙⵉⵡⵍ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵅⴼ ⵡⴰⵜⵉⴳ ⴰⵅⴰⵜⴰⵔ ⵏⵏⴰ ⵉⴼⴽⴰ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵉ ⵓⴳⴳⵉⵡⵙ ⴰⵡⵏⴹⴰⵏ, ⵍⵍⵉⴳ ⵉⴳⴰ ⵙⴳ ⵉⵙⴳⵓⵎⵏ ⵉⵏⴼⵔⴰⵔⵏ ⵏ ⵜⴷⵔⴰⵡⵉⵏ ⵏⵏⵙ ⴳ ⵓⵙⵡⵉⵔ ⴰⴳⵔⴰⵖⵍⴰⵏ, ⴷⴰⵢ ⵜⵙⴷⴷⵉⴷ ⵉⵙ ⵉⵅⵚⵚⴰ ⴰⴷ ⵜⵉⵍⵉ ⵖⵔ ⵓⵃⵟⵟⵓ ⵏ ⵜⵡⵏⵏⴰⴹⵜ ⵜⵡⵓⵔⵉ ⵙ ⵜⵎⵙⵜⴳⴳⴰⵔⵜ ⴳ ⵓⵙⴰⵜⵉ ⵏ ⵢⴰⵜ ⵜⵎⵢⴰⴷⴰⵙⵜ ⵉⵙⵎⴷⵏ ⵏ ⵜⵉⴹⴰⴼ ⵏ ⵉⵎⵉⵣⴰⵏ ⴷ ⵓⵙⴱⴷⴷⵉ ⵏⵏⵙⵏ, ⴷ ⵓⵙⵕⵚⵚⴰ ⵏ ⵡⴰⵜⵉⴳⵏ ⵏ ⵜⵏⵏⵓⴱⴹⴰ ⵉⵀⵢⵢⴰⵏ ⴷ ⵜⵣⴷⴳⵉ ⴷ ⵓⵙⵎⵏⵉⴷ ⵏ ⵓⵙⵉⴹⵏ ⴳ ⵓⵙⵡⵓⴷⴷⵓ ⵏ ⵉⵙⵓⴳⴰⵎ ⵉⴳⴰⵎⴰⵏⵏ, ⴰⵀⴰ ⵜⵙⴷⴷⵉⴷ ⵉⵙ ⴰⵢⵏⵏⴰ ⵅⵚⵚⴰⵏⵜ ⴰⵙ ⵜⵓⴳⴳⴰⵙ ⵉⵎⵓⵏⵏ ⴳ ⵍⵜⵜⵖⵏⵜ ⵇⴰⵃ ⵜⵉⴼⵓⵍⵉⵏ, ⴳⵉⵙⵏⵜ ⴰⵡⴷ ⵉⴳⵔ ⵓⵙⵍⵉⴳ ⴷ ⵡⴰⵎⵓⵏ ⵓⵖⵔⵉⵎ ⴷ ⵡⵓⴳⴳⵉⴷⵏ, ⵙ ⵓⵙⵏⵄⵜ ⵏ ⵡⴰⵜⵉⴳⵏ ⵏ ⵓⵎⵢⴰⵡⴰⵙ ⴷ ⵜⵎⵓⵔⵉ. ⵙⴳ ⵜⵙⴳⴰ ⵢⴰⴹⵏ, ⵜⵎⵍⴰ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵜⵉⵏⵥⵉⵡⵉⵏ ⵏⵏⴰ ⵅⴼ ⵉⵙⵙⵉⵡⵍ ⵓⵙⵇⵇⵉⵎ ⴳ ⵓⵙⴰⵜⵉ ⵏ ⵜⵙⵎⵉⴳⵍⵜ ⵜⴰⵙⴳⵓⵎⴰⵏⵜ ⵅⴼ ⵢⵉⴳⵔ ⵏ ⵡⴰⵎⴰⵏ ⴳ ⵍⵎⵖⵔⵉⴱ, ⴷⴰⵢ ⵜⵙⴷⴷⵉⴷ ⵉⵙ ⵉⵣⵎⵎⴻⵎ ⵎⴰⵙ ⵓⵔ ⵙⵙⴱⵖⵉⵔⵏ ⵡⴰⵎⴰⵏ ⵉⵜⵜⴰⵡⵙⵎⵔⵙⵏ ⴳ ⵜⵓⴷⵔⵉⵏ ⵙⴳ ⵓⵙⵎⴽⵍ, ⴷ ⵓⴽⵕⴰⵥ ⵏ ⵉⵎⵓⵙⵙⵓⵜⵏ ⵉⵏⴼⵍⴰⵃⵏ ⵅⴼ ⵜⵕⵡⵉ ⵏ ⵉⵙⵓⴳⴰⵎ ⵏ ⵡⴰⵎⴰⵏ ⴳ ⵜⵎⵓⵔⵜ ⵏⵏⵖ, ⵏⵏⴰ ⵉⵣⴷⵉⵏ ⴷ ⵓⴳⵓⴷⵉ ⵏ ⵉⵎⵉⵣⴰⵏ ⵏ ⵜⵎⵔⴽⵉⵜ ⵉⵣⴷⵉⵏ ⴷ ⵓⵙⵎⵔⵙ ⵏ ⵉⵎⵣⵣⵓⵔⵏ.
ⵉⵇⵇⴰⵏ ⴷ ⵓⴱⴷⴰⵔ ⵉⵙ ⵉⵙⴽⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⵜⵓⴳⵜⵜ ⵏ ⵜⵙⵎⵉⴳⴰⵍ ⵉⵣⴷⵉⵏ ⴷ ⵜⵡⵏⵏⴰⴹⵜ ⴷ ⵜⴳⵎⵉ ⵜⴰⵙⵓⵍⴰⵏⵜ ⴳ ⵍⵎⵖⵔⵉⴱ.