ⵉⵙⴷⵓⵙ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴰⴽⴷ ⵓⴳⵔⴰⵡ ⵏ ⵜⵎⵙⵙⵉⴹⵏⵜ ⵏ ⵍⵉⵎⴰⵕⴰⵜ ⴰⵎⵢⴰⵡⴰⵙ ⵉⵙⵙⵓⵔⵏ ⴳ ⵢⵉⴳⵔ ⵏ ⵓⴳⴳⵉⵡⵙ ⵢⴰⵜⵜⵓⵢⵏ ⵏ ⵓⵥⵕⴼ ⴰⴳⴷⵓⴷⴰⵏ ⴷ ⵜⵎⵙⵙⵉⴹⵏⵜ
Gallerie
ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵓⵎⵢⴰⵡⴰⵙ ⴰⵙⵉⵏⵔⴰⵏ ⵏⴳⵔ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵓⴳⵔⴰⵡ ⵏ ⵜⵎⵙⵙⵉⴹⵏⵜ ⴳ ⵓⵡⴰⵏⴽ ⵏ ⵍⵉⵎⴰⵕⴰⵜ ⵜⴰⵄⵕⴰⴱⵉⵏ ⵎⵓⵏⵏⵉⵏ, ⴳ ⵡⴰⵙⵙ ⵏ ⵡⴰⵢⵏⴰⵙ 22 ⵉⴱⵔⵉⵔ 2024, ⴳ ⵓⵙⵖⵉⵎ ⵏ ⵓⵙⵇⵇⵉⵎ ⴳ ⵕⵕⴱⴰⵟ, ⵉⵎⵎⵓⴳ ⵓⵙⴳⵎⴹ ⵏ ⵢⴰⵜ ⵜⵎⵙⵙⴽⵜⵉⵜ ⵏ ⵓⵏⵔⴰⵎⴰⵙ ⵏⴳⵔ ⵎⴰⵙⵙ ⵣⵉⵏⴱ ⵍⵄⴰⴷⴰⵡⵉ, ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⴷ ⵎⴰⵙⵙ ⵃⴰⵎⵉⴷ ⵄⵓⴱⴰⵢⴷ ⵅⴰⵍⵉⴼⴰ ⵄⵓⴱⴰⵢⴷ ⴰⴱⵓ ⵛⴰⴱⴰⵚ, ⴰⵏⵙⵙⵉⵅⴼ ⵏ ⵓⴳⵔⴰⵡ ⵏ ⵜⵎⵙⵙⵉⴹⵏⵜ ⴳ ⵍⵉⵎⴰⵕⴰⵜ, ⴰⵔ ⵜⵎⵎⴰⵍ ⵜⵙⵓⵔⵉⴼⵜ ⴰⴷ ⴰⴱⴷⴰⴷ ⵉⵙⵙⵓⵔⵏ ⵏ ⵙⵏⴰⵜ ⵜⴼⵓⵍⵉⵏ ⵅⴼ ⵓⵙⴷⵓⵙ ⴷ ⵓⵙⵓⵜⴳ ⵏ ⵉⵎⵢⴰⵙⵙⴰⵜⵏ ⵏ ⵜⴷⴷⵓⴽⵍⴰ ⴷ ⵓⵎⵢⴰⵡⴰⵙ, ⵙ ⵓⵎⵙⴰⵙⴰ ⴷ ⵉⵙⵖⵡⴰⵏ ⵉⵎⵣⵔⴰⵢⵏ ⵉⴷⵔⴰⵏ ⵏⵏⴰ ⵉⵙⵎⵓⵏⴰⵏ ⵙⵏⴰⵜ ⵜⵎⵉⵣⴰⵔ ⵜⴰⵡⵎⴰⵜⵉⵏ.
ⵙ ⵓⵎⵙⴰⵙⴰ ⴷ ⵜⵎⵙⵙⴽⵜⵉⵜ ⴰⴷ ⵏ ⵓⵏⵔⴰⵎⴰⵙ, ⴰⵔ ⵙⵡⵓⵔⵓⵢⵏⵜ ⵙⵏⴰⵜ ⵜⴼⵓⵍⵉⵏ ⵅⴼ ⵓⵙⴱⵓⵖⵍⵓ ⵏ ⵓⵎⵢⴰⵡⴰⵙ ⵏⴳⵔⴰⵙⵏⵜ ⴳ ⵢⵉⴳⵔ ⵏ ⵓⴳⴳⵉⵡⵙ ⵢⴰⵜⵜⵓⵢⵏ ⵏ ⵓⵥⵕⴼ ⴰⴳⴷⵓⴷⴰⵏ ⴷ ⵜⵎⵙⵙⵉⴹⵏⵜ, ⵜⴰⴼⴰ ⴰⴷ ⵙⵔⵙⵏⵜ ⵉⵡⵜⵜⴰⵙⵏ ⴷ ⵜⴰⵏⵏⴰⵢⵉⵏ ⵉⵙⵙⵓⵔⵏ ⴰⵡⴷ ⴰⵙⴱⵖⵔ ⵏⵏⵙⵏⵜ ⵙⴳ ⵜⵎⵓⵣⴰⵢⵉⵏ ⵏ ⵡⵉⵢⴰⴹ. ⴷⴰⵢ ⵎⵙⴰⵙⴰⵏⵜ ⵜⴼⵓⵍⵉⵏ ⵙ ⵙⵏⴰⵜ ⵅⴼ ⵜⵙⵉⵍⴰⵡⵜ ⵏ ⵉⵖⴰⵡⴰⵙⵏ ⵉⵙⵙⵓⵔⵏ ⵏ ⵓⵎⵎⵙⴽⴰⵍ ⵏ ⵜⵔⵎⵉⵜⵉⵏ ⴷ ⵜⵎⵓⵣⴰⵢⵉⵏ ⴳ ⵢⵉⴳⵔ ⵏ ⵓⵙⴰⵏⵓⵏ ⴷ ⵜⴳⵎⵉ ⵏ ⵜⵣⵎⵎⴰⵔ ⵜⵉⵣⵣⵓⵍⴰⵏⵉⵏ ⴷ ⵓⵙⵎⵓⵜⵜⴳ ⵏ ⵉⵙⵎⴰⵜⵜⴰⴳⵏ, ⴰⵡⴷ ⴰⵎⵎⵙⴽⴰⵍ ⵏ ⵉⵎⴰⵙⵙⵏ ⵏ ⵜⵡⵓⵔⵉ ⴷ ⵜⴱⵔⵉⴷⵉⵏ ⵏⵏⵙ ⴷ ⵓⵎⵙⴰⵙⴰ ⵏⵏⵙⵏⵜ ⴷ ⵜⵥⵍⴰⵢⵉⵏ ⵜⵉⵏⴰⵎⵓⵔⵉⵏ ⵏ ⵜⵎⵔⵙⴰⵍ ⵙ ⵙⵏⴰⵜ.
ⴳ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⴰⴷ, ⵜⵓⵍⵖ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⴰⵙⵎⴰⵢⵏⵓ ⴷ ⵉⵙⵍⵍⵡⵉ ⵏⵏⴰ ⵉⵍⵍⴰⵏ ⵖⵔ ⵓⴳⵔⴰⵡ ⵏ ⵜⵎⵙⵙⵉⴹⵏⵜ ⵏ ⵍⵉⵎⴰⵕⴰⵜ, ⴷⴰⵢ ⵜⵙⴷⴷⵉⴷ ⵜⵉⵎⵍⴷⵉⵡⵉⵏ ⵏⵏⴰ ⵉⵙⴽⴰⵔ ⵓⵎⵢⴰⵡⴰⵙ ⴰⴷ ⵏⴳⵔ ⵙⵏⴰⵜ ⵜⴼⵓⵍⵉⵏ, ⵜⴰⴼⴰ ⴰⴷ ⴷⵓⵙⵏⵜ ⵜⵡⵓⵔⵉⵡⵉⵏ ⵏⵏⵙⵏⵜ, ⴷ ⴰⴷ ⵜⵜⵓⵙⴱⴷⴷⵏⵜ ⵜⵏⵥⴰⵕ, ⵣⵣⵉⴳⵙⵏⵜ ⴰⵎⵓⵜⵜⵉ ⴰⵎⵓⵟⵟⵓⵏ ⴷ ⵜⵎⵓⴽⵔⵉⵙⵉⵏ ⵉⵍⴰⵏ ⴰⴷⵔⵉⵣ ⴰⴷⵎⵙⴰⵏ ⵏⵏⴰ ⵖⵔⵙⵏⵜ ⵉⴹⵉⵚ ⵅⴼ ⵓⵥⵕⴼ ⴰⴳⴷⵓⴷⴰⵏ.
ⵙⴳ ⵜⵏⵉⵍⴰ ⵏⵏⵙ, ⵢⵓⵍⵖ ⵎⴰⵙⵙ ⵃⴰⵎⵉⴷ ⵄⵓⴱⴰⵢⴷ ⵅⴰⵍⵉⴼⴰ ⵄⵓⴱⴰⵢⴷ ⴰⴱⵓ ⵛⴰⴱⴰⵚ ⵜⵉⵖⴱⵉ ⵏ ⵉⵎⵢⴰⵙⵙⴰⵜⵏ ⵉⵙⵎⵓⵏⵏ ⵙⵏⴰⵜ ⵏ ⵜⵎⵉⵣⴰⵔ, ⴷⴰⵢ ⵉⴱⴷⵔ ⵉⵙ ⴰⵔ ⵜⵎⵎⴰⵍ ⵜⵙⵎⵓⵏⵉ ⴰⴷ ⵜⴰⵎⵣⵔⴰⵢⵜ ⴰⵎⵏⵉⴷ ⵏ ⵙⵏⴰⵜ ⵜⴼⵓⵍⵉⵏ ⵖⵔ ⵓⵙⴷⵓⵙ ⵏ ⵓⵎⵢⴰⵡⴰⵙ ⴷ ⵓⵙⴱⴷⴷⵉ ⵏ ⵜⵏⵥⴰⵕ ⵉⵙⵙⵓⵔⵏ ⵙ ⵎⴰ ⵖⵔⵙ ⵜⴰⵏⴰⴼⵓⵜ ⵏ ⵙⵏⴰⵜ ⵜⵎⵔⵙⴰⵍ.
ⴷⴰⵢ ⵙⴷⴷⵉⴷⵏⵜ ⵙⵏⴰⵜ ⵜⴼⵓⵍⵉⵏ ⴰⴱⴷⴰⴷ ⵏⵏⵙⵏⵜ ⵉⵙⵙⵓⵔⵏ ⵅⴼ ⵓⵙⴽⴰⵔ ⵏ ⵜⵓⴳⴳⴰⵙ ⵉⵅⵚⵚⴰⵏ ⵉ ⵓⵙⵎⵀⵍ ⵏ ⵉⵙⴱⴷⴰⴷⵏ ⵏ ⵜⵎⵙⵙⴽⵜⵉⵜ ⴰⴷ, ⵙ ⵓⵎⵙⴰⵙⴰ ⴷ ⵉⵎⵏⵓⵙⵏ ⴷ ⵉⴽⴰⵎⴷⵏ ⵏ ⵙⵏⴰⵜ ⵜⵎⵔⵙⴰⵍ ⵏ ⵓⴳⴳⵉⵡⵙ, ⵙ ⵎⴰ ⵉⴱⵣⵣⵔⵏ ⴳ ⵓⵙⵉⵍⵉ ⵏ ⵜⵓⵙⵓⵔⵜ ⵏ ⵜⵡⵓⵔⵉⵡⵉⵏ ⵏⵏⵙⵏⵜ ⴳ ⵜⵓⴷⵔⵜ ⵏ ⵉⵏⵎⵓⵔⴰⵏ ⴳ ⵙⴰⵏⵜ ⵏ ⵜⵎⵉⵣⴰⵔ.