ⵜⵙⵙⵉⵡⵍ ⵎⴰⵙⵙⴰ ⵣⵉⵏⴱ ⵍⵄⴰⴷⴰⵡⵉ, ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⴳ ⵜⴳⵓⵔⵉ ⵏⵏⵙ ⵜⴰⵎⴳⴳⴰⵔⵓⵜ ⵏ ⵜⵉⵏⴰⵡⵜ ⵜⴰⴳⵔⴰⵖⵍⴰⵏⵜ ⵏⵏⴰ ⵜⵙⵏⵎⴰⵍⴰ ⵜⵙⵏⴱⴹⴰⵢⵜ ⵏ ⵉⵙⵉⴹⵏⵏ ⴳ ⴼⵕⴰⵏⵙⴰ, ⵙ ⵜⵎⵍⴷⴰ ⵏ ⵓⵙⵏⵎⴰⵍⴰ ⵏ ⵜⵎⵙⵎⵓⵏⵜ ⵜⴰⵎⴰⵜⴰⵢⵜ ⵜⴰⵎⵔⵙⴰⵍⵜ ⵏ ⵜⵎⴰⴷⴷⴰⵙⵜ ⵜⴰⴳⵔⴰⵖⵍⴰⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⵉⵍⴰⵏ ⵜⵉⵥⵍⴰⵢⵉⵏ ⵜⵉⵏⵣⵔⴰⴼⵉⵏ (ⵊⵓⵔⵉⵙⴰⵢ), ⴷⴷⵓ ⵜⵎⴰⵜⴰⵔⵜ "ⴰⵎⵣⵣⵔⴰⵢ ⴰⵏⴱⴹⵓ, ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⵏⵏⴰ ⵉⵜⵜⴰⵙⵉⵏ ⵜⵉⵖⵜⴰⵙⵉⵏ", ⵅⴼ ⵓⵙⵉⵡⵍ ⵏ ⵓⵙⵔⵓⵙ ⵏ ⵜⵎⵙⴽⵔⵜ ⵏ ⵜⵥⵍⴰⵢⵉⵏ ⵜⵉⵏⵣⵔⴰⴼⵉⵏ ⴳ ⵓⵎⵏⴰⴹ ⵉⵔⵉⵡⵏ ⵏ ⵉⴳⵉ ⴰⴳⴷⵓⴷⴰⵏ. ⵜⵏⵏⴰ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵉⵙ ⴷ ⵉⵇⵇⴰⵏ ⵉ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴰⴷ ⵡⴰⵜⵜⵙⵏ ⴰⵙⵔⵓⵙ ⵏ ⵓⵎⵢⴰⵙ ⵉⵎⵙⴰⵙⴰⵏ ⵏⴳⵔ ⵡⴰⵏⵢⴰ ⵏ ⵜⵎⵔⵔⵓⵜ ⴷ ⵓⵃⵟⵟⵓ ⵏ ⵜⵥⵉⴹⴰⵕ ⵏ ⵉⵎⵙⵡⵓⴷⴷⴰ ⵏ ⵉⵙⵍⵍⵡⵉ ⴷ ⵉⵎⵉⵣⴰⵏ.
ⴷⴰⵢ ⵜⵏⵏⴰ ⵉⵙ ⵉⵅⵚⵚⴰ ⵉ ⵉⴳⵔⴰⵡⵏ ⴰⴷ, ⴰⴷ ⴳⵏ ⵜⵉⵣⵉ ⴰⵡⴷ ⵉ ⵓⵙⵙⵓⵏⵏⴹ ⵉⵜⵜⴳⵓⴷⵉⵏ ⵏ ⵉⵣⵓⵣⴰ ⵏ ⵓⵙⵖⵜⵙ ⵖⵔ ⵜⵙⴳⵉⵡⵉⵏ ⵉⵍⵍⴰⵏ ⴷⴷⴰⵡ ⵏ ⵓⴳⴳⵉⵡⵙ ⴷ ⴰⴷ ⴳⵏ ⵜⴰⵎⴰⴳⵍⴰⵢⵜ ⴳ ⵓⵙⵏⵄⵜ ⵏ ⵇⴰⵃ ⵜⵉⵎⵙⵜⴳⴳⴰⵔⵉⵏ ⴷ ⵓⴱⵟⵟⵓ ⵏ ⵜⵎⵔⵔⵓⵜⵉⵏ ⴷⴰⵖ, ⴷ ⵓⵙⴱⵓⵖⵍⵓ ⵏ ⵜⵎⵢⴰⴷⴰⵙⵉⵏ ⵏⵏⵙⵏ ⵉ ⵓⴽⴰⵎⴷ ⵏ ⵡⴰⴷⴷⴰⴷⵏ ⴷ ⵜⵎⵏⵜⴰⵍ ⵏ ⵉⴳⵉ ⵏ ⵉⵣⵏⵏⵣⵔⵉⵜⵏ.
ⵙⴳ ⵜⵙⴳⴰ ⵢⴰⴹⵏ, ⵜⵙⵙⵉⵡⵍ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵅⴼ ⵜⵏⵥⴰⵕ ⵏⵏⴰ  ⵜⵙⴽⴰⵔ ⵜⵏⴱⴰⴹⵜ ⵏ ⵢⵉⵎⵉⵥ ⵏ ⵜⵖⵜⴰⵙⵉⵏ ⵜⵉⵏⵣⵔⴰⴼⵉⵏ ⵅⴼ ⵉⴳⵔⴰⵡⵏ ⵉⵎⴰⵜⵜⴰⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⵙ ⵓⵙⵉⵜⵉ ⴰⴷ, ⴰⵡⴷ ⵜⵓⵙⵓⵔⵉⵏ ⵜⵉⵏⴰⵡⴰⵢⵉⵏ ⴷ ⵜⵉⵏ ⵜⵡⵓⵔⵉ ⴷ ⵜⵎⴰⴷⴷⴰⵙⵉⵏ ⵖⵔⵙ ⵉⵇⵇⵏⵏ.
ⴷⴰⵢ ⵜⵙⴷⴷⵉⴷ ⴰⵙⵙⴰⵔ ⵏ ⵢⴰⵏ ⵓⴱⵟⵟⵓ ⴰⵎⵔⵙⴰⵍ ⴰⵎⴽⵕⴰⵥ ⵉⴼⴰⵡⵏ ⵏⴳⵔ ⵜⵙⵖⴰⵏ ⵏ ⵓⵎⵣⵣⵔⴰⵢ ⴷ ⵓⵏⴱⴹⵓ, ⴷ ⵡⴰⵜⵉⴳ ⵏ ⵓⵙⵖⵉⵡⵙ ⴰⵙⵜⵔⴰⵜⵉⵊⵉ ⵉⵜⵜⵓⵣⴷⴰⵢⵏ ⵏⵏⴰ ⵉⵡⴰⵜⵜⵙⵏ ⵜⵓⴳⵉ ⵏ ⵓⵙⵎⴰⴷ ⵏⴳⵔ ⵜⵙⵖⴰⵏ ⵜⵉⵏⵣⵔⴰⴼⵉⵏ ⴷ ⵜⴰⵔⵏⵣⵔⴰⴼⵉⵏ, ⴷ ⵓⵙⵕⵚⵚⴰ ⵏ ⵉⵙⵓⵔⴰ ⵉⵎⵔⵙⴰⵍⵏ ⵉⵕⵡⴰⵏ ⵏ ⵓⵣⴷⴷⵓⵢ ⴷ ⵓⵎⵢⴰⵡⴰⴹ ⵏⴳⵔ ⵜⵙⵎⵉⴳⴰⵍ ⵏ ⵓⵣⵣⵔⴰⵢ ⴷ ⵜⵡⵓⵔⵉ ⵜⴰⵏⵣⵔⴰⴼⵜ ⵏⵏⴰ ⵙⴽⴰⵔⵏ ⵉⴳⵔⴰⵡⵏ ⵉⵎⴰⵜⵜⴰⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ.
ⵎⴽⴷⴰ ⵜⴱⴷⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵖⵔ ⵜⵏⵥⵕⵜ ⵜⴰⵢⵓⴳⴰⵏⵜ ⵏⵏⴰ ⵉⵡⴰⵍⴰⵏ ⵉⴳⵔⴰⵡⵏ ⵉⵎⴰⵜⵜⴰⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⵉⴳⴰⵏ ⴰⵙⴷⵓⵙ ⵏ ⵜⵣⵣⵓⵍⴰ ⵏ ⵓⵏⴱⴹⵓ-ⴰⵎⵣⵣⵔⴰⵢⵏ ⵙ ⵎⴰ ⵖⵔⵙ ⵉⵇⵇⵏⵏ ⵙⴳ ⵉⵎⴰⵙⵙⵏ ⵏ ⵓⵙⵡⵓⴷⴷⵓ ⵏ ⵓⴷⴳⴰⵔ ⴰⵏⴼⴳⴰⵏ ⴷ ⵓⴹⴰⴽⴰⵍ ⵏ ⵜⵕⵡⵉ ⵏ ⵜⵎⴳⴳⴰ.
ⵜⴱⵓⵖⵍⴰ ⵜⵎⵙⴰⵔⵜ ⴰⴷ, ⵏⵏⴰ ⵉⵜⵜⵓⵙⵏⵎⴰⵍⴰⵏ ⵙ ⵓⵎⵢⴰⵡⴰⵙ ⴷ ⵜⵎⵔⵙⵍⵜ ⵜⴰⴳⵔⴰⵖⵍⴰⵏⵜ ⵏ ⵓⵥⵕⴼ ⴰⵎⴰⵜⴰⵢ FONDAFIP, ⵙ ⵜⴷⵔⴰⵡⵜ ⵏ ⵜⵓⴳⵜⵜ ⵏ ⵉⵡⵔⵉⴽⵏ ⵉⵜⵜⵡⴰⵙⵙⵏⵏ, ⴳⵉⵙⵏ ⵉⵏⵙⵙⵉⵅⴼⵏ ⴷ ⵉⵎⵙⵜⴳⴳⴰⵔⵏ ⵏ ⵉⴳⵔⴰⵡⵏ ⵉⵎⴰⵜⵜⴰⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ, ⴰⵡⴷ ⵉⵎⵓⵣⴰⵢⵏ ⴷ ⵉⴽⴰⴷⵉⵎⵉⵢⵏ ⴷ ⵉⵎⵔⵣⵓⵜⵏ.