ⵉⴷⵔⴰ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⵡⵓⵔⵉⵡⵉⵏ ⵏ ⵜⵎⵓⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ ⵏ ⵉⵡⴰⵏⴽⵏ ⵏ ⵜⵔⴰⴱⴱⵓⵜ ⵏ ⵡⴰⴳⵏⴰⵔ (SAI20 Summit)
ⵉⴷⵔⴰ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ, ⵙⴳ ⵜⵓⴳⴳⵓⴳⵜ ⴳ ⵡⴰⵙⵙ ⵏ 16 ⴷ 17 ⵢⵓⵏⵢⵓ ⴰⴷ, ⴳ ⵉⵎⵓⵙⵙⵓⵜⵏ ⵏ ⵜⵎⵓⵏⵜ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ ⵏ ⵉⵡⴰⵏⴽⵏ ⵏ ⵜⵔⴰⴱⴱⵓⵜ ⵏ ⵡⴰⴳⵏⴰⵔ ⵉⵜⵜⵓⵙⵏⵎⴰⵍⴰⵏ ⴳ ⵜⴳⵔⴰⵡⵜ ⵏ ⴱⴰⵕⴰ ⴳ ⵜⴳⴷⵓⴷⴰⵏⵜ ⵜⴰⴼⵉⴷⵉⵕⴰⵍⵉⵜ ⵏ ⴱⵕⴰⵥⵉⵍ, ⵙ ⵢⴰⵜ ⵜⵖⵓⵔⵉ ⵏ ⵜⵏⵙⵙⵉⵅⴼⵜ ⵏ ⵜⵎⵓⵏⵜ ⴰⴷ ⵉⴳⴰⵏ ⵜⴰⵙⵏⴱⴹⴰⵢⵜ ⵜⴰⴼⵉⴷⵉⵕⴰⵍⵉⵜ ⵏ ⵉⵙⵉⴹⵏⵏ ⴳ ⴱⵕⴰⵥⵉⵍ. ⵎⴽⴷⴰ ⵅⴼ ⵙⵙⵉⵡⵍⵏ ⵉⵎⵙⵜⴳⴳⴰⵔⵏ ⵉⵎⵥⵍⴰⵢⵏ ⴳ ⵜⵡⵓⵔⵉⵡⵉⵏ ⵏ ⵜⵙⵎⵓⵏⴰⵢ ⵜⵉⵜⵉⵇⵏⵉⵢⵉⵏ ⵜⵉⵙⵎⴰⵜⵜⴰⴳⵉⵏ ⵏ ⵜⵎⵓⵏⵜ ⴰⴷ ⵏⵏⴰ ⵉⵜⵜⵓⵙⵏⵎⴰⵍⴰⵏ ⴳ ⵜⵎⴰⵥⵓⵏⵜ ⵏ ⴱⵕⴰⵥⵉⵍⵢⴰ ⴳ ⵡⴰⵢⵢⵓⵔ ⵏ ⵉⴱⵔⵉⵔ ⵉⵣⵔⵉⵏ. ⵜⵥⵍⵉ ⵓⵎⴰⴳⵔ ⵏ ⵓⵙⴳⴳⵯⴰⵙ ⴰⴷ ⵙ ⵓⵙⵥⵕⴼ ⴰⵎⵏⴳⵉⴳⵜ ⴷ ⵓⵙⴱⴷⴷⵉ ⵏ ⵓⵥⵍⴰⴹ ⴷ ⴳⴰⵔ ⵓⵜⵛⵉ, ⵏⵏⴰ ⵉⴳⴰⵏ ⵉⵎⵔⵙⵉⵜⵏ ⵉⵍⴰⵏ ⵜⴰⵎⵙⵔⵓⵙⵜ ⵜⴰⵅⴰⵜⴰⵔⵜ ⴳ ⵓⵎⵏⴰⴹ ⵏ ⵓⵖⴰⵡⴰⵙ ⵏ ⵜⵎⵙⴽⵜⵉⵜ ⵏ 2030 ⵏ ⵜⴳⵎⵉ ⵜⴰⵙⵓⵍⴰⵏⵜ.
ⴳ ⵜⵖⵉⵎⵉⵜ ⵉⵥⵍⵉⵏ ⵙ ⵜⵙⴳⵓⵔⵉⵡⵉⵏ ⵜⵉⵎⴰⵜⴰⵢⵉⵏ ⵏ ⵉⵏⵙⵙⵉⵅⴼⵏ ⵏ ⵉⴳⵔⴰⵡⵏ, ⵜⵙⴷⴷⵉⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⵎⴰⵙ ⴷ ⵉⵇⵇⴰⵏ ⵓⴱⴷⴰⵔ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴳ ⵎⵏⵏⴰⵡⵜ ⵜⵡⵓⵔⵉⵡⵉⵏ ⵏⵏⵙ, ⴳ ⵉⵎⵏⵉⴷⵏ ⵉⵙⵜⵔⴰⵜⵉⵊⵉⵢⵏ ⵏ ⵜⵎⵓⴽⵔⵉⵙⵉⵏ ⴷ ⵜⵏⵥⴰⵕ ⵉⵣⴷⵉⵏ ⴷ ⵓⵙⵥⵕⴼ ⴰⵎⵏⴳⵉⴳⵜ ⴷ ⵓⵎⵓⵜⵜⵉ ⵓⵥⴹⵉⵕ ⴷ ⵓⵙⴱⴷⴷⵉ ⵏ ⵓⵥⵍⴰⴹ ⴷ ⵍⴰⵥ, ⴰⵀⴰ ⴰⴷ ⵡⴰⵜⵜⵙⵏ ⴰⴷ ⵉⵍⵉⵏ ⴷ ⴰⵎⴰⵡⴰⵙ ⴰⵎⵙⵖⴰⵔⵓ ⴰⵣⵣⵓⵍⴰⵏ ⴰⵏⵉⵎⴰⵏ ⵉⵍⴰⵏ ⵜⵉⵕⵡⵉ ⵉ ⵜⵏⴱⴰⴹⵉⵏ ⵜⴰⴼⴰ ⴰⴷ ⴼⵓⴽⴽⵓⵏⵜ ⵙ ⵜⵎⵓⵏⵜ ⵏ ⵓⵙⵏⵉⵎⴰⵍ ⵉⴱⴷⴷⵏ ⵅⴼ ⵜⵡⵓⵔⵉⵡⵉⵏ ⵏ ⵓⴳⴳⵉⵡⵙ ⵉⵍⴰⵏ ⵜⵓⵙⵓⵔⵜ ⵢⴰⵜⵜⵓⵢⵏ, ⴷⴰⵢ ⵜⵙⴷⴷⵉⴷ, ⴳ ⵓⵙⴰⵜⵉ ⴰⴷ, ⵉⵙ ⴰⵎⵓⵔⵙ ⵏ ⵉⴳⵔⴰⵡⵏ ⴳ ⵜⵙⵎⵉⴳⴰⵍ ⵏⵏⵙⵏ ⵉⵣⴷⵉⵏ ⴷ ⵓⵙⵥⵕⴼ ⴰⵎⵏⴳⵉⴳⵜ ⴷ ⵓⵙⴱⴷⴷⵉ ⵏ ⵓⵥⵍⴰⴹ ⵓⵔ ⵉⵙⴽⴰⵔ ⵖⴰⵙ ⵢⴰⵏ ⵓⵎⵣⴰⵔⴰⵢ ⴳ ⵜⵓⴷⵔⵜ ⵏ ⵉⵏⵎⵓⵔⴰⵏ ⴷ ⵓⵙⴷⵓⵙ ⵏ ⵜⵣⵔⴼⵜ ⵜⴰⵏⴰⵎⵓⵏⵜ ⴷ ⵜⴷⵎⵙⴰⵏⵜ ⴷ ⵜⵎⵏⴳⵉⴳⵜ ⵏⴳⵔ ⵜⴰⵙⵓⵜⵉⵏ, ⵎⴰⵛⴰ ⵓⴳⴰⵔ ⵏ ⵓⵢⵏⵏⴰ ⴰⵔ ⵉⵜⵜⴰⵡⴹ ⵙ ⵓⵙⴰⴷⵎⵔ ⵏ ⵉⵎⵉⵣⴰⵏ ⵉⵏⵉⵍⴰⵡⵏ ⵉⵎⴰⵢⵏⵓⵜⵏ ⴷ ⵓⵙⴷⵓⵙ ⵏ ⵜⵙⵓⵍⵜ ⵏ ⵉⵎⵙⴰⵙⴰⵜⵏ ⵉⴷⵙⵍⴰⵏⵏ ⵏ ⵓⵥⵕⴼ ⴰⴳⴷⵓⴷⴰⵏ.
ⵜⵙⴷⴷⵉⴷ ⵎⴰⵙⵙⴰ ⵜⴰⵏⵙⵙⵉⵅⴼⵜ ⵜⴰⵎⵣⵡⴰⵔⵓⵜ ⴳ ⵉⵏⴰⵡ ⵏⵏⵙ ⵅⴼ ⵜⵉⵔⴰⵜ ⵏ ⵓⵙⵇⵇⵉⵎ ⴰⵏⴰⴼⵍⵍⴰ ⵏ ⵉⵙⵉⴹⵏⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵃⵎⴰ ⴰⴷ ⵎⵓⵏⵏⵜ ⵜⵡⵓⵔⵉⵡⵉⵏ ⵏⵏⵙ ⵏ ⵓⴳⴳⵉⵡⵙ ⴷ ⵉⵙⴰⵡⵔⵏ ⵉⵙⵜⵔⴰⵜⵉⵊⵉⵢⵏ ⵉⵣⴷⵉⵏ ⴷ ⵜⴰⵏⵏⴰⵢⵜ ⵏ ⵓⵡⴰⵏⴽ ⴰⵎⵖⵔⴰⴱⵉ ⴰⵏⴰⵎⵓⵏ ⴰⵜⵔⴰⵔ, ⵏⵏⴰ ⵎⵓ ⵉⵙⵔⵙ ⵜⵉⵔⵙⴰⵍ ⵏⵏⵙ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙ ⵚⴹⵉⵚ ⴰⴷ ⵜ ⵉⵙⵙⵏⵔⵓ ⵕⴱⴱⵉ ⵢⴰⵡⵙ ⴰⵙ, ⴰⵡⴷ ⴰⴷ ⵖⵓⴷⵓⵏ ⵉⵙⵓⴽⴰ ⵏ ⵓⵙⴽⴰⵔ ⴷ ⵓⵣⵣⴳⵉⵔ ⵏ ⵉⵖⴰⵡⴰⵙⵏ ⵓⵥⴹⵉⵕⵏ ⴷ ⵓⵎⵙⴰⵙⴰ ⵏⵏⵙⵏ ⴷ ⵜⵥⵍⴰⵢⵉⵏ ⵜⵉⵏⴰⵎⵓⵔⵉⵏ.
ⵎⴽⴷⴰ ⵜⵙⵎⴰⵢⵏⵓ ⴰⵙⵖⵓⵏ ⵏ ⵓⴳⵔⴰⵡ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙ ⵉⵎⵏⵣⴰⵢⵏ ⵏ ⵜⴳⵔⵓⵎⵎⴰ ⵏ ⵡⴰⴳⵏⴰⵔ ⴷ ⵓⵣⵣⵉⴳⵣ ⵖⵔ ⴷⴰⵜ ⴳ ⵓⵎⵢⴰⵡⴰⵙ ⵉⴱⵓⵖⵍⴰⵏ ⵏⵏⴰ ⵉⵜⵜⴰⵡⵙⵏ ⵉ ⵓⴳⴳⵉⵡⵙ ⵢⴰⵜⵜⵓⵢⵏ ⵏ ⵓⵥⵕⴼ ⴰⴳⴷⵓⴷⴰⵏ ⴳ ⵡⴰⵜⵉⴳⵏ ⵏⵏⵙ ⵉⵖⵓⴷⴰⵏ ⴷ ⵉⵎⵓⵖⵏⴰ ⵏⵏⵙ ⵉⵜⵜⵓⵙⵎⴰⵢⵏⵓⵏ.
ⵉⵇⵇⴰⵏ ⴷ ⵓⴱⴷⴰⵔ ⵉⵙ ⵉⴳⴰ ⵓⵎⴰⴳⵔ ⵏ ⵡⴰⴳⵏⴰⵔ ⵙⴳ ⵉⵙⵓⵜⴰⵢ ⵉⵏⴼⵔⴰⵔⵏ ⵏ ⵓⵎⴹⴰⴽⴰⵕ ⴷ ⵓⵎⵙⴰⵡⴰⵍ ⵉⵙⵎⵓⵏⴰⵏ ⵉⵏⵙⵙⵉⵅⴼⵏ ⵏ ⵉⴳⵔⴰⵡⵏ ⵢⴰⵜⵜⵓⵢⵏ ⵏ ⵓⴳⴳⵉⵡⵙ ⴰⵥⵕⴼⴰⵏ ⴷ ⵜⵎⵙⵙⵉⴹⵏⵜ ⵜⴰⵎⵣⵡⴰⵔⵜ ⵉ ⵓⵣⵣⵔⴰⵢ ⵏ ⵜⵎⵓⴽⵔⵉⵙⵉⵏ ⴷ ⵉⴽⵓⵎⴰⴷ ⵉⵙⵙⵓⵔⵏ ⵉⵣⴷⵉⵏ ⴷ ⵓⴱⵓⵖⵍⵓ ⵏ ⵓⴳⴳⵉⵡⵙ ⴰⵥⵕⴼⴰⵏ ⴳ ⵢⵉⴳⵔ ⴰⵎⴰⵜⴰⵢ, ⴰⵡⴷ ⵜⵉⵏⵥⴰⵕ ⵜⵉⵎⵇⵔⴰⵏⵉⵏ ⵏⵏⴰ ⵉⵡⴰⵍⴰⵏ ⴰⵎⵓⵏⵏ ⵉⵜⵔⴰⵔⵏ.